Татар поэт тыгак Российысе да Казастанысе сылнымутчо-влакын ойпогыштым кусарен. Чылаже ныл книгам савыктен. Эртыше кечылаште Озаҥ олаште, Татарстан Республикысе Келшымаш пӧртыштӧ, книга-влакын презентацийышт эртен. Тушто Марий Эл Республикын калык поэтше Геннадий Ояр лийын да кусарыше Р.Курбановлан марий сылнымутым тыге кумдан ончыктен пуымыжлан тауштен ойлен.
Рафис Курбанов мыняр-гынат марий тӱвырам пален, молан манаш гын тудын шочмо ялже, Изи Битаман, Юлсер кундемысе Усола Корамас ял деч икмыняр меҥге тораште веле верланен. Тунемме школжо Усола Корамас кыдалаш школ дене келшен илен, пырля спорт таҥасымашым, «Келшымаш тулотым» эртареныт. Тунеммыж годым Рафис йолташыж-влак дене пырля мероприятийлаште участвоватлен.
