Чаманаш логалеш, кызытсе саманыште театрын труппыжо марий-влак шукын илыме кундемлаш коштын ок керт, постановкылан да моло роскотлан ожнысо гай кугыжаныш полыш уке. Садлан ты гана «Чолман» газет редакций Икымше марий съездлан 100 ий темме вашеш 9-12 мартыште Марий тӱвыра кече-влакым районлаштат эртараш тӱҥалеш.Тыгай кумда культмассовый пашаш М. Шкетан лӱмеш Марий кугыжаныш театрын да Марий Эл Республикысе марий тӱвыра рӱдерын артистше-влакым ушаш йӧным муын, нунын дене пырля калык коклаш лекташ кутырен келшышна. Кугу концерт программе деч посна кечывалым икмыняр школышто вашлиймашым эртараш палемдышна. Мӱндыр унана-влак мемнан марий-влаклан пӧлек шотеш «Йоча-влаклан муро» марий диск-влакым, тӱрлӧ книгам кондаш сӧрышт. Школлаште вашлиймаш годым «Марла ойлаш тунемына» мультурок-влак дене палыме лийына.

Творческий вашлиймашым 9 мартыште Мишкан районысо Чорай ялгыч тӱҥалаш шонена. Тунемше-влаклан — Я. Ялкайн лӱмеш марий гимназийыште, йыр кундемысе калыклан — кастене верысе клубышто.

10 мартыште Нефтекамскысе филармонийыштекугу концерт лиеш, 11 мартыште Дӧртыльӧ районысо марий-влаклан тыгаяк концерт оласе тӱвыра полатыште 19 шагат кастене тӱҥалеш, а 12 мартыште Шаран селаште (РДК)18 шагатеш тусо марий-влак дене вашлийына, воза  «Чолман» газет.