Олма эн ончыч кечывалвел Казахстан ден Киргизийыште шочаш тӱҥалын. Тиде кундемлаште кызытат ир олмапу-влак кушкыт. Вес версий почеш олмапу Каспий ден шем теҥыз-влак коклаште кушкын.
Марий-влак деке тудо волжский булгар-шамыч деч логалын. Кызыт гын олмапу кажне пакчам, садым шошым сылне пеледышыже, шыжым тамле саскаже дене куандара.
Тиде кечын калык пӱртусым эскерен.
Саска илян але олма спас кечын могай игече лиеш, тугаяк Покро кечын лийшаш.
Кукшо кече кукшо шыжым, ночко – ночкым, а ояр кече йӱштӧ теле лийшашым шижтара.
Саска илян кечын моторлыкшым марий художник-влакат ужын моштеныт. Теве Зосим Лаврентьев, Россий Федерацийын калык художникше, Марий АССР-ын искусствын сулло деятельже, тыге ужын, 1991 ийыште «Яблочный Спас. Совершеннолетие» картиным возен.
