Шым район да Йошкар-Оласе тунемме тӧнежла гыч 18 йоча пашам конден. Презентаций-влак икымше марий калык Погынын делегатышт, тыгак Россий да марий кундемнам пашашт дене чапландарыше марий ӱдырамаш-влак нерген лийыныт. Чын, икымше теме дене кум паша веле пурен, а кокымшо теме, чынжымак, тунемше-влаклан моткоч лишыл лийын. Залыште шинчыше-влаклан марий артистке, поэтессе, шанчызе, туныктышо, ялысе фельдшер, тӱрлызӧ, тӱвыра пашаеҥ-влакын илыш корныштым йоча шинча дене ужын аклаш, нунын лӱмеш возымо почеламутыштым колышташ куанле ыле. Эсогыл икмыняр геройжо залыште лийын. Хореограф Л.В. Пашуткина Луиза Гаврилован ойлымыжым шулен колыштын, варажым шинчен туркен огыл, тыгай кугу кӱкшытан фестивальым эртарымылан тауштен, пелашыж дене коктын Пошкырт вел «Уна мурым» йоҥгалтареныт. Сардаял ялысе тӱвыра пӧртын фольклор ансамбльын участникше-влак школ директор П.В. Сорокина нерген презентацийым шкевел мурышт дене сылнештареныт.
Марий кугыжаныш университетысе лудмыверын книга ончержат эртарыме темым почын пуэн.
Жюрин палемдымыж почеш, республик кӱкшытан конкурсын гран-прижым Медведево район Юбилейный поселкысо кыдалаш школын тунемшыже Ирина Григорьева сеҥен налын. Тудо профессор, культурологий доктор Галина Шкалина нерген «Чий тӱням илем моктен» презентацийым ямдылен. Икымше вер дене Куженер вел Коҥганур школ гыч Кристина Быкова «Паня Смирнова — Коҥганурын шочшыжо» пашаж дене лектын.
Советский район Кадам школ гыч Валентина Кушакова ден Волжский район Кугу Корамас школ гыч Дмитрий Михайлов кокымшо вер дене палемдалтыныт.
Кумшо вер кок тунемшылан логалын: Оршанке район Упшо школ гыч Полина Ятмановалан да Йошкар-Оласе 14-ше номеран гимназий гыч Анна Атлашкиналан.
Сеҥыше да призер радамыш логалше-влаклан дипломым кучыктымо. А пӧлек да сертификат деч посна ик участникат каен огыл. «Марий Эл», «Ямде лий» газет-влакын, «Кече» йоча журналын редакцийышт, Марий Элысе Писатель-влак ушем, «Саскавий» марий ӱдырамаш ушем, посна еҥ-влак — Республикысе марий тӱвыра рӱдерым вуйлатыше Н.В.Пушкина, мурызо С.А.Яндукова — шке призышт дене йоча-влакым палемденыт.
Марий Элын тӱвыра, печать да калык-влакын пашашт шотышто министрын аламаштышыже Г.С.Ширяева, «Ший талешке» республик кӱкшытан конкурсын участникше-влакым саламлен, тунеммаштат, мер сомылыштат чолгалыкым да пеҥгыдылыкым ончыкташ ӱжын.
Мероприятий концерт дене мучашлалтын. Мурызо-влак С. Яндукова, С. Устюгов, А. Егошин, гармоньчо Э. Петрова, бард мурызо Г. Григорьев сылне мурышт дене куандареныт.
