«Талешке аллей» — марий калыкын эрыкше верч талын шогышо геройжо-шамычым, лӱмлӧ эргыж ден ӱдыржӧ-влакым шарныме акций. Кугу Ачамланде сарыште илаш-колаш кредалше, тылыште йӱдшӧ-кечыже пашаште тазалыкым лунчыртышо лишыл родынам, пошкудынам порын шарналтен, нунын лӱмеш пушеҥгым шындена, чодырам, чон кандарышым, куштена. Эше 1918 ийыште «Ӱжара» газет возен: «Чодыра – банкыш пыштыме окса дене иктак». Ончыкылык тукымлан, айста, марий-влак, пӱртӱс поянлыкым шынден кодена. Чодыра тӱшка еш дене поян, маныт, калык — пырля ыштыме пашаже дене.