Таче Ешын Тӱнямбал кечыже палемдалтеш. Тудым 1993 ийыште ООН-ын Генральный Ассамблейже резолюцийже дене пеҥгыдемден.

Еш –кажне еҥлан илыш эҥертыш. Таклан огыл марий калык манеш: «Тичмаш еш тичмаш киндерке дене иктак» да ешара «Тӱшка ешыште –вий-куат, илыш сем, шӱм моторлык». Марий писатель, поэт-влакат еш нерген шке шонымашыштым возымо произведенийышт гоч почыныт. Теве Вениамин Иванов тыгерак возен: «Еш илыш –модыш огыл, тудын яндарлыкшым ӱмыр мучко шинчасорта семын аралыза». Вячеслав Абукаев-Эмгак тыге ойлен: «Еш икшыве дене пелед тӱла».

Пагалыме йолташ-влак! Ешын Тӱнямбал кечыже дене алал кумылын саламлена! Еш илышда эр ӱжара семын нӧлталт шогыжо, чевер кече семын шӱм-чондам ырыктыже, саска гае пеледше, илыш тӱтан воктечда эртен кайыже.