Республикыште веле огыл, Россий кӱкшытыштат мастарлык дене ойыртемалтше гармонист Анатолий Ермаковын шоктымыж почеш погынышо-влак марий-влакын илыме тӱрлӧ кундемысе сем почеш тавалтеныт, а такмак-влакым Раисия Петрова, Зинаида Кошкина. Зинаида Васеева яндар йӱкышт дене йоҥгалтареныт. Эсогыл видеовойзышым ыштыме жапыштак Анатолий Киткаев гармонистын семже почеш куштен, «йол шкеак кая» — манын шыргыжалын.

Мероприятий годым саламлыме шомакат ятыр йоҥген. Республикысе марий тӱвыра рӱдер вуйлатыше Наталья Пушкина «Чон оҥгыр» фольклор ансамбльын участницыже-влак Зинаида Васеева ден Зинаида Рыбаковам шочмо кечышт дене алал кумылын саламлен, тазалыкым, еш пиалым тыланен, марий тӱвырам нӧлтымаште надырым пыштымыштлан тауштен ойлен.

«Марий касыште» Германий гыч  уна-влак лийыныт. А Москва гыч  унала толшо  руш ӱдырамаш Нина Шаламова, сылне марий тувырым чиен, моло дене пырля шогал тавалтен.

— Мариемже марий, У Торъял районын эргыже Александр Канатеев, — каласыш Нина. — Келшен илена, ныл йочам ончен куштенна. Москваште эртаралтше «Пеледыш пайремыш» кажне ийын каем. Тидлан лӱмынак «Сайвер» ательеште марий тувырым ургыктенам. Марий калык мыланем чон моторлыкшо, поро кумылжо да пашам йӧратымыже дене шӱм-кылемлан лишыл.