Марий калыкна ожнысек ӱдырын марлан каяш ямде улмыжым тергымашым эртарен. Тудым шыжым, мланде пашам иктешлымеке, эртареныт. Тидлан ялыште пӧртым ойыреныт, озаж дене кутырен келшеныт. Пайремлан ямдылалтме сомыл шкешотан лийын: ӱдыр-влак «Ӱдырсийыш» толшо каче-влакым сийлаш лӱмынак пӱрым шолтеныт, киндым пыштеныт, йӧратыме качыштлан пӧлекым ямдыленыт. Тыгай пайремыште ӱдыр ден каче палыме лийыныт, варажым ешым погеныт, йочам куштеныт.
Республик кӱкшытан конкурсыш 18 гыч 25 ияш марте ӱдыр-влак ушнен кертыт. Конкурсыш ушнышо ӱдыр-влак 16 октябрь марте йодмашым тыгай электрон адрес дене колтышаш улыт: mari-centr@mail.ru але факсыш (836)2 45-88-51.
Тушко ушнышо-влакын сеҥымаш деке корнышт икмыняр тапыр гоч эрта. Эн ончыч шкешт, марий калыкнан эртыкше да йӱлаже дене палдарышаш улыт. Икманаш, «Мый марий ӱдыр улам» ой-савыртышым кӱчыкын да рашын почын пуаш тӱҥалыт.
Марий калыкнан йӱлаже-влак нерген спектакль сынан (театрализованный) модмаш гоч конкурсантке-влак усталыкыштым почын пуат. Тидын годым мондалтше йӱла пайремым ончыктымаш сайрак аклалтеш. Тушто мурат йоҥгалтшаш, куштымашат лийшаш, моло мастарлыкымат почын ончыкташ лиеш.
Марий ӱдыр ожнысек моторлыкым аклен илен, чиемымат шке тукымвожшын, илыме кундемжын але ялжын ойыртемжым пагален ямдылен. Лач тиде ойыртемым «Этномодо» тапыр почын пуа.
Конкурсантке-влак калыкнан йӱлажым, эртыкшым кузе палат? Тидлан вашмутым уш-акылым пудыратыше тапыр гоч пален налына.
Участнице-влак 16 октябрь марте марий вургемым чийыман кум фотографийым Республикысе марий тӱвыра рӱдерыш колтышаш улыт. Нуным марий тӱвыра рӱдерын официал сайтыш: mari-centr.ru – але «Марий тӱвыра рӱдер» группын «вконтакте», «одноклассники» социал кылыш вераҥдена. 16 гыч 26 октябрь марте интернет-йӱклымаш эртаралтеш. Тушто сеҥыше конкурсантке «Ончышо-влакын симпатийышт» приз дене палемдалтеш.
Ӱдыр-влак, конкурсыш ушныза, шке вийдам тергыза.
Палемдыман, 2016 ийыште «Ӱдырсий» конкурсыш Марий Эл, Пошкырт да Татарстан кундемла гыч куд ӱдыр ушненыт. Гран-прим Куженер район гыч Полина Савельева сеҥен налын.
