Республикысе марий тӱвыра рӱдерын увертарымыж почеш, тений тушко ушнышо ӱдыр-влак марий калыкын тӱрлӧ йӱлажым ончыктен кертыт. Адакшым «Ӱдырсийыш» толаш вес кугу амал уло – тушто марий кумылым почын ончыктышо вургем коллекцийым ужаш лиеш. Конкурсант-влакат мероприятийлан ямдылыме вургемыштым ончыкташ тӱҥалыт. Тыгак конкурс-влак коклаште шке мурыштым  марий эстрадын шӱдыржӧ-влакын, «Этномириада» тӱнямбал фестивальыште лауреат лӱмым налше «Сото вий» фольклор ансамбльын выступленийыштым аклаш лиеш.

Шыжа тылзын 17 числаже марте куд ӱдыр конкурсыш ушнаш йодмашым пуэныт. Провой, Морко, Марий Турек да Оршанке районла гыч толшаш улыт. Тыгак Республикысе тӱвыра колледж тунемшыжым  конкурслан ямдыла.

Конкурс тудо конкурс: сеҥышым муэш. Тушко ушнышо кажне ӱдыр тиде радамыш логалын кертеш: тӱҥ спонсорын короныжым чияш праважым налеш. Коронын озаже кажныже лийын сеҥа: тидлан конкурсантлан  тудым поддержатлыше тӱшкан — шкевелысе ансамбль-влакын йӱлам почын пуымаште полшымышт да ончаш толшо-влакын  — полыш кидыштат йӧным ышта.

Вучена, йолташ-влак, тендам 29 октябрыште Йоча ден самырык-влаклан театр-рӱдерыш: марий ӱдыр-влакын усталыкыштым аклаш, марий эстрадын шӱдыржӧ ден марий коллектив-влакын выступленийыштым ончаш. Тыгай мероприятий гоч марий калыкнан йӱлажым кушкын шогышо тукымлан ончыктена,  кӱлешлыкшым аклаш туныктена.