Тиде кечын кочкыш йӧрварлан поян ярмиҥга эртен. Тушто мӱйым, шӧр-торыкым, пакчасаскам, пареҥгым толшо кажне еҥ налын, телылан шапашым ыштен.

Марий калыкым Угинде пайрем дене Марий Эл Республикын тӱвыра, печать да калык-влакын пашашт шотышто министр М.З.Васютин, ялозанлык да кочкыш сату министр Ю. Н. Сидыганов, «Российысе марий-влакын федерал калыкле-тӱвыра автономий» мер организацийын председатель Л.Н. Яковлева саламленыт. Оҥаеҥ-влак дене пырля у шурно гыч пучымышым шолтымашке ушненыт.

Йошкар-оласе «Марий кумалтыш» организацийын онаеҥже Ю.Д. Тушнурцев:

«Шукерте огыл, шыжа тылзын кандашымше кечынже, ме Йошкар-Оласе кумалтышым эртарышна. А ынде Угинде пайремым марий калык дене тӱшкан пайремлышна. Тиде марий йӱла ожно годсек кучылталтеш. Тыгодым ялысе калык ешым поген, пошкудо-влакым ӱжын, тамле киндым пурлыныт.

Марий калыклан Россий кугыжаныш полшен шогыжо, калыкнан илышыже таза да ласка лийже манын тыланем. Тыгак лийже манын, ме, онаеҥ-влак, пелештен шогена, кумалына, сай илышым йодына».

Тиде кечын Марий тӱвыра рӱдер весела концертым Чарла Кремльын сценыштыже эртарен. Тыгак «Ныжыл сем», «Чон оҥгыр», «Сото вий», «Мурпеледыш», «Кома вел», «Алан», «Муро сем» фольклор ансамбль-влак, Русалина Исламгалиева, Александр Мамаев, Ольга Якимова, Геннадий Григорьев, Станислав Устюгов да Полина Савельева мурышт дене куандареныт, кушташ таратеныт. Киров кундем гыч «Уржум вел» ансамбль пайремыште вучымо уна толын.

Оҥай конкурс да модыш-влак калыклан кылмен шогаш жапым пуэн огытыл.

Марий тӱвыра рӱдерын пашаеҥже Галина Ласточкина:

«Йошкар-Оласе Угинде пайрем — регион кӱкшытан пайрем. Марий Элыш Виче кундем гыч марий-влак тиде шыже пайремын йӱлажым шукташ лӱмын мемнан деке толыныт.

Тиде пайрем Йошкар-Олаште кокымшо гана веле эртаралтеш. Икымше гана «Угинде» 2015 ийыште эртен, тыгак тӱрлӧ кундем гыч марий-влак толыныт. Тунамат ялозанлык пазар пашам ыштен, тӱрлӧ кочкыш сатум ужалыме, а марий-влак шке койышыштым ончыктеныт, йӱлам шуктеныт.

Тений уэш тиде пайремым эртараш шонымаш лектын, молан манаш гын, Угинде — тиде шке шотан пайрем. Мутлан Агавайрем годым ме Юмо дечын сай лектышым йодына, сай шурным, ласка мардежым, леве йӱрым йодына, шыже толмеке, ме Юмылан кугу таум каласена. Тыге шот-ратым шуктен ме шке йӱланам переген кодена».

Алевтина Актубаева, «Весела сем» ансамбль:

«Мыланем Угинде пайрем – тиде шыже паша иктешлымаш. Ожно годым монгыштына авам тиде кечылаште шокшо киндым, когыльым кӱештын. Ешым чумырен, пошкудо-влакым ӱжынна, Юмылан пелештена ыле, да вара шокшо кочкышым сийлен улына. Кызыт тиде юла эркын-эркын мондалташ тӱналын…Чарла Кремльыште тиде йӱлам угыч шочыктат. Марий калыклан мый кужу ӱмырым, сай кумылым тыланем, тек йӱлам эре шарнен шогат да марий улмына деч вожылаш огеш кӱл.

Ирина Павлова, Алевтина Бокова, «Межэтнический журналистик школын» тунемшыже-влак.