Марафонышто участвоватлыме шотышто йодмашым районла да Йошкар-Ола гыч 11 школ пуэн ыле, но тӱрлӧ амаллан кӧра кок район гыч толын кертын огытыл. Тӱҥ шотышто кугурак класслаште тунемше-влак усталыкыштым да команде дене пашам ыштен моштымо кӱкшытым тергеныт. Эсогыл кыдалаш школ-влак веле огыл, тӱн школ гыч тунемше-влак интеллектуал марафоныш ушненыт. Теве Марий Турек район Сардаял тӱҥ школын «У вий» командыже чулымлыкым ончыктен. Тыгак Советскиий район Ӱшнӱр кыдалаш школ гыч «Ӱшан» да Ургакш лицей-интернат гыч «Ургакш еш», Морко район гыч 1-ше шомеран кыдалаш школ гыч «Чолпан», Медведево гыч «Маска тукым», Шернур икымше номеран школ гыч «Марий улына», Руэм поселкысо лицей-интернат гыч «Л-юзывий», У Торъял район гыч «Ал ӱжара» да Йошкар-Оласе 14 -ше гимназий гыч «ВийАР» команде-влак таҥасеныт.

Кум тапыр дене эртыше марафонын темыже Марий Элнан лӱмлӧ еҥже, йылме ден сылнымутшо да марий калыкын йӱлаже нерген лийын. Йодыш-влак шкешотан, чынжымак, вуйым пудыратыше, уш-акылым тергыше лийыныт. Нуным марий шанчызе-влак ямдыленыт да шкештак марафонышто, чын але чын огыл вашмутым пуат, тергеныт. Тиде — Сергей Константинович Свечников, Никандр Семенович Попов да Виталий Тимраевич Михайлов.

«МУНЛО» интеллектуал марафонышто Ӱшнӱр школын «Ӱшан» командыже, эн шуко очком поген, икымше верыш лектын. Кубокым тиде школын икоян командыже налын.

Морко район гыч «Чолпан» команде кокымшо верым налын. Кумшо верыщ«Ургакш еш» команде лектын.

Тыгак капитан-влак коклаште таҥасымаш лийын. Тушто Сардаял тӱҥ школ гыч «У вий» командын капитанже Ольга Буденная сеҥен.

Марафоныш толшо кажне тунемшылан сертификатым кучыктымо, пӧлекым ыштыме. Туныктышо-влаклан таумутым кучыктымо.

Поро йӱлаш пурышо «МУНЛО» марафон ончыкыжымат эрташ тӱҥалеш манын ӱшанен кодына.