Тӱҥжӧ – калыклан келшыже, ялысе клубыш але театрыш, лудмыверыш але оласе тӱвыра полатыш толаш кумылжо лийже, уремыште але паркыште, я плошадьыште эртаралтше фестивальыш але конкурсыш, концертыш толын, моло дене пырля кушталтен-муралтен, пашасе нойымыжо эртыже, шӱм-чонжо каныже, эр ӱжара гай нӧлтшӧ кумылан суртысо омсажым почын пурыжо. Тидлан тӱвыра пашаеҥ-влаклан ятыр тыршыман, но, манмыла, сцене шеҥгелне…Тиде нерген шагалже пала да умыла. Туге гынат концертыш але спектакльыш, фестивальыш але конкурсыш толшо-шамычын тау мутышт ончыкылык пашалан вийым ешарат.

Марий йӱлам, тӱвырам да йылмым арален да нӧлтен шогымаште культур пашаеҥ-влакын надырышт кугу. Икте куандара – икте-весынан пашам ме поддержатлен шогена. Тидлан КУГУ ТАУ!

Пагалыме йолташна, коллегына-влак, тек паша кумылда олык семын пеледеш, усталыкда кушкын шога, у деч у сеҥымаш куандара. Таза, пиалан лийза!

Республикысе тӱвыра рӱдерын коллективше.