Лӱмлӧ марий поэтым саламлаш ятыр еҥ толын. Нунын коклаште Марий Эл Республикын тӱвыра, печать да калык-влакын пашашт шотышто министрын алмаштышыже Галина Ширяева, Кугыжаныш Погын вуйлатышын пресс-секретарьже Александр Петров, МарНИИ вуйлатыше Евгений Кузьмин, марий сӱретче Иван Ямбердов, марий сылнымутым пырля куралше йолташыже-влак толыныт. Ончычсо пашаште пырля тыршыше йолташышыже-влакат Геннадий Леонидович дене иквереш ыштыме жапым порын шарналтеныт. Кызыт лӱмгечызе Республикысе марий тӱвыра рӱдерын йылме да тӱвырам вияҥдыме инноваций пӧлкажым вуйлата, МарНИИ-н пашаеҥже-влак дене пырля пӧлка пашаеҥ-влак марий йылме корпусым ыштымаште тыршат. Рӱдерын пашаеҥже-влак шке коллегыштым саламлен, тазалыкым, кече гае волгыдылыкым, пашаштыже кугу сеҥымашым, марий сылнымутым вияҥдыше у лудыш-влак дене ончыкыжымат куандараш тыланеныт.

Марий кугыжаныш университетын туныктышыжо, педагогике шанче кандидат Виталий Михайлов марий серызын илыш да паша корныж нерген каласкален, произведенийже-влаклан акым пуэн, возымаштыже марий йылмын ямжым кучылт моштымо кӱкшытшым пример гоч рашемден.

Вашлиймаш касым Республикысе марий тӱвыра рӱдер пеленсе «У муро» вокал группо ден «Кас сем» семӱзгар дене шоктен мурышо ансамбль сӧрастарен. Мурызо-влак Геннадий Григорьев, Александр Мамаев, Геннадий Куклин, Ольга Якимова, Полина Савельева да Анатолий Тимофеев, Валерий Чиванов Геннадий Сабанцевын почеламутшылан возымо муро-влакым йоҥгалтареныт.