Аганур ял марий историйыште 1920-1930-шо ийлыште туныктымаш да мер илышыш кугу надырым пыштыше Иван Одарын (И.Е. Романовын) лӱмжӧ дене кылдалтын. Тудлан ӱмаште 14 октябрьыште шарнымаш кӱымат тыште почмо. Лач ты кӱ воктенсе чатка аланыште изирак поэзий пайрем лийын.

Поэтым да туддене пырля толшо уна-влакым вашлияш ял калык пагален ямдылалтын: шарнымаш кӱ воктенсе аланымат йытыраен, чесымат ыштен. Поэт шке землякше-влак ончылно почеламут-влакым лудын, а Республикысе марий тӱвыра рӱдер пеленсе “У муро” студийын “Кас сем” ансамбльжын самодеятельный артистше-влак: Г. Григорьев, Г. Куклин, А. Тимофеев, П. Савельева, тыгак В. Чиванов, О. Якимова ден А. Мамаев – сылне муро-влакым пӧлекленыт.

Поэзий да муро пайрем уна-влакланат, ял калыкланат келшен. Ял калык ужатыме годым уэш толаш тыланымашым каласен.