Икшыве – илышын куанже, чечен пеледышыже. Таче йочам шуарымаште, уш-акылжым да кид-йолжым пеҥгыдемдымаште шуко йӧн уло. Тиде йӧным, мутлан, Республикысе марий тӱвыра рӱдер шке пашаштыже кучылтеш да марий кундемысе ола ден районласе икшыве-влаклан тӱрлӧ сынан марий пайрем ден мероприятий-влакым эртара. Икмыняр ий почела Йочам аралыме тӱнямбал кечылан пӧлеклалтше «Изи мӧр пеледыш» республик кӱкшытан пайремым ямдыла да ола ден ялла гыч марий падыраш-влакым ӱжеш. Теният тиде йӱла деч кодмо огыл: эрла тудо Калыкле президент сымыктыш школышто эрташ тӱҥалеш. Тыге йоча-влакым марий йылмым, йӱлам да тӱвырам пагален илаш туныкта.
Марий тӱвырана да йылмына икшыве чоныш шыҥдарымаште вес йӧнымат кучылтеш – рӱдер пелен кок йоча ансамбльым чумырымо. Тушко марий рӱдолаште илыше икшыве веле огыл, эсогыл ола деч тора огыл ялла гыч йоча-влак кумылын коштыт, марла мураш, семӱзгар дене шокташ тунемыт. Нуным чӱчкыдын оласе сценылаште ужаш лиеш.
Тыгак йоча-влак марий йылмым, тӱвырам сайын палышт манын, марий мультфильмым, видеоурокым войзымо, республикысе да марий-влак илыман регионлаште шарыме.
Тыгай паша дене ме, марий тӱвыра рӱдерын пашаеҥже-влак, кызытсе куштылго огыл илышыште йоча ынже торжаҥ, оккӱл дене ынже алгаштаралт манын туныктена, арален шогена.
Пагалыме йоча-влак! Пайрем дене алал кумылын саламлена. Тек илышда порылык да куан тул дене эрта. Лийза ача-авадан, коча-ковадан эҥертышыже. Таза, пиалан лийза, кеҥеж канышда йомартлын эртыже.
Ача-ава-влаклан йочам ончымаште да илыш корныш шогалтымаште пеҥгыдылыкым тыланена.
