«Марла ойлаш тунемына» мультурок проект — тиде кызытсе илышлан келшыше, кӱлешан туныктымо йӧн. Школыш коштдымо але изирак класслаш коштшо йоча-шамыч мультфильмысе тӱҥ-герой-влак – Юкече да Тачана — дене марла чын кутыраш тунемын кертыт. Тӱрлӧ чия дене сӧрастарыме сӱрет-шамыч, куштылго йылме дене возымо мутланымаш, оҥай герой-влак йоча-влакын кумылыштым марла ойлаш тунемаш путырак савырат. Тиде мультурок-влак тӱҥ тунеммашлан пеш кӱлешан ешартыш улыт. «Марла ойлаш тунемына» мультурок-влакым дискышке возымо да нуным тыгак интернетыште муаш лиеш.

«Марий йылме дене электрон урок-влак» этнокультур проектын тӱҥ шонымашыже – марий йылмын негызше дене палдарымаш. Электрон урок-влак тора гычын (дистанционный) тунеммаш манмым ушештарат. Тӱрлӧ кундемыште илыше, но марий йылмым тунемаш кумылан-влак лачак тиде электрон урокла дене яра да эрыкын пайдаланен кертыт. Нине уроклаште тунемме ужаш да тест-влак лийыт. Тестым сайын эртымеке, вес урокыш вончаш лиеш. Тиде проект «Российысе марий-влакын федерал калыкле-тӱвыра автономийышт” мер организаций гоч шукталтеш. Урокла дене тений идалык мучаште пайдаланаш тӱҥалаш йӧн лиеш.

Кумшо проектна у тукымлан марий калыкын поян тӱвыражым, илыш-йӱлажым, шке шотан койышыжым, илыш-кучышыжым видеофильм-влак гоч ончыкташ тӱҥалеш. Тиде паша Марий Элыште гына огыл, а тӱрлӧ кундемлаште илыше марий-влакын йӱлаштым, илыш шотыштым почын пуа. Видеофильмыште ятыр калык муро, куштымаш лиеш, тыгак марий вургемат ончыкталташ тӱҥалеш. Шочмо калыкын йӱлаж нерген лудаш оҥай, но шке шинча дене ончаш эшеат сӧрале. Видеофильм-влак DVD-дискеш возалтыт.

Кӱшнӧ ойлымо проект-влак марий йылмым вияҥдымаште, кумылан-влакым шочмо калык культур дене палдарымаште кугу ошкылым ыштат. Кызыт шуктымо пашан палыже марий калыкын ончыкылык корныштыжо пеш раш кояш тӱҥалеш, манын ӱшанена.