3 декабрьыште «Живопись – марий калыкын тӱвыражын ужашыже» марий сӱретче-влакын ончерышт почылтеш.
6 декабрьыште «МАРЛА ЧЫН ВОЗЕНА» 7-ше тӱшка диктантыш марий йылмым палыше кажне еҥ ушнен кертеш. Тудо Марий кугыжаныш университетын тунемме да лабораторий корпусыштыжо эрта.
10 декабрьыште Марий тӱвыра форум лиеш. Мер-политик рӱдерыште эр гыч кас марте тӱрлӧ мероприятийым палемдыме.
Калык усталык сату ончер, фотоончер, марий кочкышым тамлымаш марий тӱвыран эртыше да кызытсе йыжыҥжым почеш. Тидым пайремын унаже-влак варажым мастар класслаште практике велым шуарен кертыт. Тушто нуным марий сӧрастарышым, курчак аралтышым, финн тарелкым ышташ, марий тӱрым тӱрлаш туныктат. Тыгак «Марла чын возена» мастар класс марий йылмын чеверлыкшым почеш. «Книга памаш» ончер у марий книга-влак дене палдара.
Форумын туныктымо ужашыште марий профессор Любовь Абукаева «Йылмыште – калыкын чонжо, илыш умылымашыже да койыш-шоктышыжо» да «Калык ончылно чолган кутыро» лекций-влакым лудеш. Марий Эл Республикын шочмо йылмым туныктышо-влакын ассоциацийыштын кумдаҥдыме заседанийже лиеш. Йыргешке ӱстеллаште марий лексикографийын вияҥме корныжым лончылат. «Электрон увер аҥаште – марий йылме да тӱвыра» вашмутланымаш эрта.
Марий тӱвыран вияҥмыже да ончыкылыкшо нерген «йыргешке ӱстел» лиеш. «Марий куштымашын юзо вийже», «Марий муро» усталык лабораторий-влак эртат. Марий сылнымутым йӧратыше-влакым поэзий унагудо вуча.
Кугыеҥ-влак коклаште «Мунло» уш-акыл марафон тений кумшо гана эрта, районла да Йошкар-Ола гыч команде-влакым уша.
Йоча-влаклан посна мероприятий-влакым палемдыме. Нуным «Уштодыш модыш» модыш, «Театр да йоча» театр унагудо вучат, тыгак мастар класслаште шинчымашыштым да кид мастарлыкыштым пеҥгыдемден кертыт.
Марий тиште кече пайрем концерт дене мучашлалтеш.
Пайремын организаторжо-влак – Марий Эл Республикын тӱвыра. печать да калык-влакын пашашт шотышто министерствыже, Республикысе марий тӱвыра рӱдер, Мер-политик рӱдер, Туныктыш да шанче министерстве, Марий кугыжаныш университет, И.С. Палантай лӱмеш Республикысе тӱвыра да сымыктыш колледж, Марий Мер каҥаш, «Российысе марий-влак» федерал калыкле-тӱвыра автономий,
