Кугу Ачамланде сар годым блокадым шалатымаште 490000 наре еҥ колен, а марий кундем Ленинградым аралымаште 4000 утла эргыж ден ӱдыржым йомдарен. Тидын нерген «Ший корно» регионысо марий калыкле-тӱвыра автономийын лукмо «Мы вместе защищали Ленинград» шарнымаш книгаже ойла.
Пискаревский шӱгарлаште марий мланде гыч 134 еҥым тоеныт, а братский шӱгарлаште мынярын кият – палаш неле. Шарныктыш плитам почмо дене нунынат патырлыкышт курымешлан шарнымашеш кодеш. Марий кундемын шочшыжо-влаклан плита 107-ше лийын.
Мероприятийыш Йошкар-Ола гыч Марий Эл Республик Виктер вуйлатышын икымше заместительже Михаил Васютин, кугыжаныш да мер пашаеҥ-влак лийыныт. Тыгак тышке кугу сарыште вуйым пыштыше родо-тукымыштын кийыме верышкышт Звенигово, Параньга велым лишыл еҥышт, тукым шочшышт толын коштыныт.
Патырле салтак-влакым шарныме лӱмеш эртарыме айо мероприятий «Ший корно» мер ушемын еҥже-влакын тыршымыштлан кӧра эртаралтын.
