«Lingva-Территорий» йылме фестиваль тений шымше гана эртаралтеш. Тушто шочмо йылмын ковыралыкше, илыш-йӱла да тӱвыра, шочмо элын але кундемын сӧраллыкше нерген каласкалаш да ончыкташ тӱҥалыт. Тудо 18-ше пургыжышто Марий кугыжаныш университетын Калыкле тӱвыра да тӱвыра кокласе коммуникаций институтышто лиеш. Тений фестиваль жапыште презентатор-влак 20 наре йылме дене палдараш тӱҥалыт. Нунын радамыш теат ушно, йолташ! Мероприятий 14 шагатлан тӱҥалеш.

Тенийсе илышын косаже йылме фестивальым эртарымашке вашталтышым пуртен. Тудо шинчаваш ончен вашлийме занятий деч посна дистанционный манме йӧн денат эртаралтеш. Кокымшо йӧнжӧ ZOOM платформо гоч кучылталтеш. Тудын гоч финн-угор йылме-влак дене Йошкар-Оласе да икмыняр районысо школлаште тунемше-влак палыме лийын кертыт.

Мероприятий кок йӧнжӧ денат ик жапыште, 14 шагатлан, тӱҥалеш. Организатор-влак, Республикысе марий тӱвыра рӱдер ден Марий кугыжаныш университет, санитар да эпидемиологий шотышто мерым тӱрыс шукташ тӱҥалыт.