Таҥӱчашыш Марий Эл, Татарстан да Пошкырт кундемла гыч руш да марий йылме дене 45 паша пуреныт. Кажне паша – ава вӱр дене шӱм-чоныш шыҥыше шочмо йылмын ямжым шижын моштымо, тудын ончыкылыкшо верч тургыжланыме кумыл саска.

13-16 ияш тунемше-влак коклаште Юлсер кундем Памар кыдалаш школын тунемшыже Юлия Белова икымше верыш налын.

 Кокымшо верыш Йошкар-Оласе Семеновка селасе 21-ше номеран кыдалаш школын тунемшыже Надежда Ямбакова лектын.

Морко поселкысо 1-ше номеран школ гыч Анна Алексееван пашажым кумшо вер дене палемдыме.

17 гыч 20 ияш марте таҥӱчашыш ушнышо-влак коклаште, чаманаш логалеш, ик пашат пурен огыл. Тидыже, мутат уке, шонаш тарата…

21 гыч 35 ияш марте конкурсант-влак коклаште Волжск ола гыч Анжела Тимоеван пашажым эн сайлан шотлымо.

Курымарий район Сурский тӱҥ школын туныктышыжо-влак Татьяна Ивановна Карасеван да Светлана Александровна Андрианован пашашт кокымшо да кумшо верлаш лектыныт.

Марий Элын калык писательже Геннадий Ояр шкенжын призшым палемден. Тудын озаже — Шернур поселкысо Совет Ушем Герой А.М. Яналов лӱмеш 1-ше номеран кыдалаш школын тунемшыже Дмитрий Веденькин.

Конкурсым Марий тӱвыра рӱдер эртарен. Сеҥыше-влак диплом да приз дене палемдалтыт. Кажне конкурсантлан сертификат кучыкталтеш.