Нуно кугезыштым эре шарнен иленыт, Сорта кечын эрдене, Семык годым кечывалым, Покро кечын кастене уштеныт.

Вӱргечын калык мончаш пурен, тоштыеҥымат пырля пураш ӱжын. Эрдене озавате коҥгам олтен, мелнам кӱэштын. Пытартыш кум мелнам уштымо ӱстембаке шынден. Тудыжым омса тӱрыш вераҥденыт. Тышкак шыл лемым, моло йӱла кочкышым шынденыт. Кумалме годым тоштыеҥлан шӱрым кум гана «пукшеныт». Вара родо-тукымым, кинде-шинчал дене мийышым сийленыт.

Вес тӱняш кайыше-влаклан онаеҥ кум сортам чӱктен. Иктыжым – киямат тӧралан да киямат савушлан, весыжым – коча-ковалан, ача-авалан, кумшыжым – родо-тукымлан да вес тӱняш кайыше пошкудылан. Пытартышлан чевер чесым (корно коркам) ямдыленыт.

Корка гыч мелнам, туарам пукшеныт, аракам йӱктеныт. Вара чыланат онаеҥ почеш уремыш тоштыеҥым ужатен лектыныт. Икте кидыш киндым, весе шӱр кӱмыжым, кумшо пурам налыныт. Чыланат пакчаш лектыныт, тушто кумалыныт. Атылам пушеҥгыш, кӱкшӧ укшыш, шындылыныт, тыгак  посна верыш поген коденыт. Пӧрт гыч могай радам дене лектыныт, тугак пӧртылыныт. Эрлашынже пакчаш кодымо чесым вольыклан пукшеныт.

Уштымо  кече гыч кодшо тӱҥ сортам суртышто кученыт, черланыме годым тазалыкым йодын кумалыныт, колышо деч полыш толмылан ӱшаненыт.