Марий калык конгрессын исполкомжым вуйлатыше, Республикысе марий тӱвыра рӱдерын директоржо Н.В.Пушкина 2016 ийысе паша дене палдарен, республик кӱкшытан, марий тӱвыра ден йӱлам аралаш да вияҥдаш полшышо мероприятий-влакым эртарен колтымаште мер толкынын еҥже-влакын надырыштым палемден.

«Марий калык конгресс» мер толкыным кодшо ий август гыч Марий кугыжаныш драме театрын директоржо М.И.Матвеев вуйлата. Ончычшо тудын пашажым Э.В.Александров виктарен шоген, 2016 ий апрельыште эртыше Х Марий калык Погынышто Эдуард Васильевичлан Мер Каҥашым вуйлаташ, Оньыжа лияш ӱшаныме. М.И.Матвеев мер пашам марий амалкалче, ялозанлык вуйлатыше-влакым мер илышыш ушымо гыч тӱҥалын.

 Йошкар-Ола, У Торъял да Советский районласе мер толкынын еҥже-влак идалык мучко ыштен шогымо пашашт нерген каласкаленыт, тыгак пӱсӧ йодышымат нӧлталме: ялысе школлаште марий йылмым шочмо йылме семын туныктымо кӧн кидыште? Советский район Ӱшнӱр школ вуйлатыше В.Ф.Галкин тыге ойлен: «Чылажат директор деч шога! Пытартыш жапыште марий йылмым кугыжаныш йылме семын туныктымаш ялысе школлаште ешаралтеш. Молан? Вич кече тунемман, а куд кече огыл». Тиде йодыш шотышто шке шонымашыштым М.И.Матвеев ден «Параньга район» муниципал образованийым вуйлатыше Л.Л.Михеева каласеныт.

Конференцийыште ревизионный комиссийын отчетшым колыштмо. Марий калык конгрессын пашажым сайлан шотлымо. Вуйлатышымат сайлыме – ик йӱк дене М.И. Матвеевлан мер пашам умбакыже виктараш ӱшаныме. Тыгак исполкомым да тудын вуйлатышыжым сайлыме. Тиде сомылым педагогик шанче кандидат А.С.Ишалин шукташ тӱҥалеш. Исполкомыш икмыняр у еҥым пуртымо. Ончыкшым мер толкынын сайтшым угыч «иландараш», тыгак газетшым лукташ палемдыме.

Тений 28 мартыште «Марий калык конгресс» мер толкыным ыштымылан 15 ий темеш. Тиде жапыште тудо йолымбаке пеҥгыдын шогалын, марий калыкнан тӱвыражым, йылмыжым да йӱлажым арален да вияҥден колтымаште изи огыл надырым пыштен.