Акрет годым марий ÿдырамашын илыш корныжым тудын чийыме вургемже дене пален налаш лийын. Марий тÿр, вуйчием да сöрастарыме ÿзгар – вургемын кажне ужашыжым марий-влак юзо виянлан шотленыт да аралтыш семын акленыт.

Вургемыште тÿрлымö марий тÿрым ончен, айдемын кушто илымыжым, могай тукым гыч улмыжым да могай еш гыч лекмыжым, чон поянлыкшым пален налаш лиеш. Символ-влакым чын «лудын», ме кугезына-влакын пÿртÿс дене кылыштым умылен кертына.

Пеш ожно шочшо тÿрлымö мастарлык курымла дене вияҥын толын, саманлан келшышын вашталтын, пойдаралтын.. Курыкмарий вургем шке сынан лийын да кызытат тугаяк кодеш. Олыкмарий-влакын вургемышт вуйчиемым шотышко налын, кум тӱшкалан шелалтеш.

Ош вынер мемнан калыклан лӱмым пуэн: Ош марий. Ош тÿсыш шеме, шемалге-йошкарге, кÿреналге ден ужар тÿсан орнамент-влакым ешареныт. Варарак марий калыкын вургемыштыже йошкар тÿс утларак палдырнаш тÿҥалын. Тидлан посна кушкыл ден шудым кучылтыныт.

Марий вургем тачат угыч вийым налын ила, тÿрым тачысе саманлан келшыше чиемыште кучылтыт. Отыш, пайремлаш мотор марий вургем дене толыт. Тиде марий-влак илыман кажне регионышто палдырна. Кажне вере, илыме кундемыштлан келшыше тувырым чиен, отыш лектыт, пырля калык пайремым палемдат.