Телым ужатен, шошым вашлийына!
Таче, 26 февральыште, Медведево район Пӱкшерме фольклор пӧртыштӧ йоча-влаклан Ӱярня пайрем эртен. Тений тудо 11-ше гана лийын.
Параньга, Морко, Медведево районласе да Йошкар-Ола гыч команде-влак лийыныт. Йоча-влак «Ӱярня мелна» конкурслан мелнам кӱэштыныт да презентацийым ончыктеныт. Такмак-влакым ямдыленыт да сценыште муралтеныт. «Ӱярня кува» чучылым ыштен аклаш конденыт.
Параньга районысо Кугу Пумарий кыдалаш школын «Самырык тукым» командыжым жюри эн чолга да мастар семын ойырен.