Фестиваль кышкарыште «Одо марий ушемын», Удмуртийысе самырык марий-влакын «Ӱжара» ушемыштын, тысе марий ўдырамаш-влакын «Ава шӱм» ушемыштын иктеш чумырымо пленумышт пашам ыштен. Кажне организацийын еҥже-влак ыштыме паша нерген ойленыт, ончыкыжым шуктышаш сомыл нерген радамленыт. Пленумын пашажым Удмуртийысе марий-влакын ушемыштым вуйлатыше Анатолий Радыгин вӱден.

Валерий Григорьев пленумыш да тӱвыра пайремыш толшо-влакым Марий Эл Республик Правительстве, Тӱвыра, печать да калык-влакын пашашт шотышто министерстве да Кугыжаныш Погын лӱм дене шокшын саламлен. Тудо Удмурт Республикысе Грах район администрацийым вуйлатыше Виктор Беловлан тиде кундемыште марий йылмым, марий калык тӱвырам, кугезе-влакын йӱлаштым аралымаште да вияҥдымаште, калыкын кӧргӧ чон поянлыкшым ешарымаште да уш-акылжым шуарымаште чот тыршымылан Марий Эл Кугыжаныш Погынын Таумутшым кучыктен.

Пленум сай лектыш дене пашам ыштен. Тушко толшо-влакым варажым чылаштымат республик кӱкшытан марий тӱвыра пайрем куандарен. Погынышо-влакын кумылыштым шке усталыкышт дене Грах районысо посна мастар да коллектив-влак вӱчкеныт. Тыгак толшо уна-влакат – Роза Искакова ден Геннадий Григорьев – икмыняр сылне мурым пӧлекленыт.