Ӱдыр-рвезе-влак моло конкурсыштат чолга лийыч. «Ӱярня кува — 2015» конкурсыш 13 курчакым кондышт. Тыге икымше верыш Оршаҥге район Кугунур школ лекте, кокымшо верыш — Советский район Келмаксола школ, кумшо верыш — Морко район Шоруньжа школ.

«Ӱярня — мелна 2015»конкурсыш 50 наре тӱрлӧ мелнам кӱэшт кондышт. Мастарлыкышт, йӱлам сайын палымышт дене Морко район Шоруньжа школ ойыртемалте (1 вер). Йоча-влак туныктышо да ава-кова дене пырля Ӱярнян шым кечыжлан шым тӱрлӧ мелнам кӱэштыныт. Ӱстелым кӱлеш семын сылнештареныт да презентацийымат веселан ыштеныт.

Тиде конкурсышто кокымшо верым Кужэҥер район Шӱдымарий школлан пуышт, кумшым — У Торъял район Кузнеч школлан.

Палемдыман, мелна-влак лӱмышт денат сымыстарышт: «Марля куван мелнаже», «Оля кокан мелнаже», «Кыстывийын мелнаже» (эрвелмарий мелна — Шернур район Купран гыч) да молат.

Йоча-влаклан «маскайолым» чиен таҥасашат келшыш. Тыгай маскайолым кидмастар Виталий Кудрявцев ямдылен.

Мутат уке, Республикысе йоча пайремын ик эн тӱҥ шонымашыже: кушкын толшо тукымым марий ден руш Ӱярнян ойыртемже дене палдараш, марий модыш дене модыкташ, марий йӱлам палаш да аклаш туныкташ. Теве марий йӱла почеш, Ӱярня годым курчакым огыл, а ий мучко погынышо шӱкым йӱлалтеныт — тыге осалым поктеныт.

Республикысе йоча Ӱярням Марий тӱвыра рӱдерлан Марий Элысе тӱвыра, печать да калык-влакын пашашт шотышто министерстве, туныктымаш да шанче министерстве,  Советский район Ӱнӱр школ эртараш полшышт.