Ий еда тудо 19 январьыште лиеш. Марий верам кучышо-влак тиде кечым «Юмым чыкыме кече» але «Вӱд модмо кече» маныт. Тиде кечын шыртше тарваныме жапше. 19 январь деч вара пӱртӱс вашталтеш, кече ырыкташ, киса эркын мураш тӱҥалеш. Тиде пагытыште кечыйолат вӱдым чотырак ырыкта. Сандене тиде жап эше мланде ылыжме пагытлан шотлалтеш. Лач ты кечын вӱд левешт кая. А тидыже кӱшыл да ӱлыл магнитный поле вашкылым кучымылан кӧра лиеш.
Тиде кечын налме вӱдым тылзе ваштареш шындет гын, тудо идалык мучко эн виян лиеш. Тыгай вӱд дене капымат мушкаш, пӧртымат эрыкташ лиеш. Тидлан юзо виян вӱдым вес вӱдыш ешараш келшен толеш.
Ты кечын южо вере Вӱд авалан кумалыт, тудлан шере колым, шем агытаным але шем лудым пуат.
Вӱдым налме годым пелештыме мут
Таче Вӱд модмо кечет, Вӱд ава, Вӱд суксо йывыртыктен толын шого. Ший памаш дек толын шогалын, ший вӱдетым налын, ший вӱдет дене мушкылтын, таум ыштен пелештем. Ший вӱд гай вий-куатым поген шогаш, капкыл тазалыкым, кужу ӱмырым йодам. Сурт-печышкем наҥгаен, еш дене мушкылтын да йӱын, тазам, аралтышым йодам. Вольыклан йӱктем, таза, тӱле лийже. Вӱд авалан, Вӱд суксылан алал лийже. Чыла осалым ойырыза, ончыкыжым сай илышым виктарен шогыза. Мыйын пелештымем алал лийже.
Онаеҥ В.Актуганов
