Вашлиймашым Марий Эл Республик виктем вуйлатышын алмаштышыже, тӱвыра, печать да калык-влакын пашашт шотышто министр М.З. Васютин почын да Олег Тактаровлан пагален толмыжлан тауштен ойлен. Михаил Зиновьевич актерын аважлан, Валентина Ивановналан, 70 ий темме лӱмеш марий тӱран солыкым, марий калыкын эртыше да кызытсе илышыж нерген «Марийцы» монографий книгам кучыктен.

Олег Николаевич марий калык гыч лекмыже, шке тукымвожшо нерген кугешнен каласкален. Тиде годым палемден, кочаже «Путевка в жизнь» икымше йӱкан киношто Йыван Кырлян мурымо «Ой, луй модеш» мурым чӱчкыдын мурен. Тыгак Российысе да Америке актер-влак дене пашам ыштыме нергенат оҥайын шарналтен.

Марий тӱрызӧ Ираида Степанова актерлан кыне тувырым сугыньлен чиктен, тӱр-влакын палыже нерген умылтарен.

15 сентябрьыште О.Н.Тактаров дене вашлиймаш умбакыже шуйна.