Михаил Зиновьевич «Марий Эл» газетын пашаеҥже П.Ш.Шакировым «Россий Федерацийын культурын сулло пашаеҥже» лӱмым налме дене саламлен, шке алмаштышыже Г.С.Ширяевалан «За заслуги перед Марий Эл» орденын медальжым кучыктен.
Чылаже конкурсыш 93 претендент деч 303 йодмаш пурен, тышеч 85 книгаже марий йылме дене лийын. 25 книгам йочалан возымо. Чылаже 13 номинацийыште сеҥышым палемдыме.
«Идалыкын эн сай книгаже» номинацийыште Г.И.Прокушевын «Очерки о художниках Марий Эл» книгаже лектын. Тудым савыкташ В.А.Чеботкин ямдылен.
«Лудшо-влакын симпатий призыштым» тиде книга сеҥен налын.
«Лудмывер дене сай вашкыллан» номинацийыште С.Г.Чавайн лӱмеш Калыкле лудмыверын кумылаҥдыше дипломжым «Пенсионер» да «Семейная газета» газет-влакын учредительже да тӱҥ редакторжо, Россий журналист ушемын марий регионысо пӧлкажым вуйлатыше О.А.Стариковалан кучыктымо.
«Эн сай шанче савыктыш» номинацийыште «Красная книга Республики Марий Эл. Том «Животные» книга лауреат лӱмым сеҥен налын. Тудым Марий Эл Республикын экологий лӱдымшыдылык, пӱртӱс да калыкым аралыме шотышто Департаментше, Марий кугыжаныш университет ден «Кугу Какшан» кугыжаныш заповедник луктыныт.
«Эн сай туныктыш савыктыш» номинацийыште С.К.Свечников ден С.С.Волковын серыме «История и культура народов Марий Эл» книгашт лауреат лӱмым сулен. Тудым Марий книга савыктыш луктын.
«Марий Эл Республик нерген эн сай книга» номинацийыште «Марий Эл: колыбель души мари – «Марий Эл»: марий еҥын чон шепкаже» книга сеҥен. Тудым А.С.Абдулов ямдылен, «Марий Эл» газет савыктен.
«Марий Элын ойыртемалтше еҥ нерген эн сай книга» номинацийыште В.М.Васильев лӱмеш марий йылме, сылнымут да историй шанче институтын лукмо «История Марийского края в лицах. 1941-1945 г.г. Великая Отечественная война: историко-биографические очерки» книга сеҥышыш лектын.
«Изи ачамланде нерген эн сай книгалан» Валентин Созонов ден Аркадий Курочкинын серыме «Мари-Чумбылат – Аимково» книгам шотлымо.
«Эн сай поэзий сборник» номинацийыште «Тек куржыт ий-влак» книга лауреат лӱмым сеҥен налын. Авторжо – Зинаида Ермакова. Марий Эл Республикысе Писатель ушем савыктен.
«Марий йылме дене эн сай книга» — тиде «Кӱрылтшӧ муро: марий литератор-фронтовик-влакын мурсаскашт: почеламут, ойлымаш, очерк, мыскара». Тудым Г.Зайниев чумырен. Марий книга савыктыш луктын.
«Йочалан эн сай книга» номинацийыште «Ямде лий» газетын тӱҥ редакторжо Л.Семенован чумырымо «Родо-тукым еш: финн-угор калык-влак нерген» ойпого лауреат лӱмым сеҥен налын.
«Эн сылнын сӧрастарыме книга» номинацийыште Пет Першутын «Муравьиная свадьба: поэма-сказка» книгаже лектын. Тудым Российын калык художникше, график да живописец З.Ф.Лаврентьев сӧрастарен.
«Полиграфий велым эн чаплын ямдылыме книга» номинацийыште «В объективе – эпоха: Марийское телевидение в 1960-2015 годах» книга лауреат лӱмым сеҥен налын. Тудым Г.Н.Михайлова ден О.А.Кошкина возеныт да чумыреныт. Марий книга савыктыш ямдылен, Угарман оласе «Поволжье» ООО-што печатлыме.
«Марнетын шӱдыржӧ» конкурсыш марий йылме дене лекше сайт-влакым кучышо тӧнеж, редакций, посна еҥ-влак ушненыт. Тушто «Кидшер» сайт сеҥышыш лектын. Учредительже да редакторжо – самырык меръеҥ Н.И.Любимов.
