Пайремыште ончылгоч палемдыме конкурс-влак иктешлалтыныт. «Эн сай у ий вургем» номинацийыште Шернур район сеҥен. Эвелина Егошина тошто марий вургемыш у ий сыным пуртен кертын. Кокымшо верыште Медведеве (Аня Никитина), кумышо верыште Кужэҥер (Сергей Иванов)  район-влак улыт.

«У ий модыш» номинацийыште ончылно Медведеве (Сергей Крылов), вара — Оршаҥге (Софья Козлова) да У Торъял (Валерия Куклина).

«У ий открытке» номинацийыште сеҥышыш Шернур (Полиана Овечкина) лектын. Тыгак Килемар (Дарья Пуртова)  да Советский (Эльмира Усова) ойыртемалтыныт.

Пайрем сценарийыште Марий тÿвыра рÿдерын коллективше шке мастарлыкшым ончыктен. Рывыж да Поҥго – вуйлатыше Наталья Пушкина,  Агытан – методист Галина Ласточкина, Поҥго – фольклор ансамбльым вуйлатыше Эльвира Петрова, Теле – методист Светлана Яндукова, Лумÿдыр – калык театрым вуйлатыше Светлана Строганова да Йÿштӧ Кугыза – методист Алексей Юнусов.

Спонсор-влакын полышышт кажне йочалан у ий пӧлекым кучыкташ йӧным ыштен да чапле пайремыш савырен.