Ончышаш теме-влакым программе дене келшышын палемдыме. Тушто шинчымашым нӧлтышӧ-влак Россий Федераций этнотӱвыран ойыртемже, СМИ-лаште этнос-влак кокласе кыл нерген чын серыме дене, Россий Федерацийын калыкле политике шотышто закон-влак дене палыме лийыт. Журналистын этикыже йодыш денат занятий эртаралтеш. Тыгак миграций йодышым СМИ-лаште кузе возымо шотыштат мутланымаш пайдале лийшаш.
Тунемаш толшо-влаклан келге шинчымашым пуаш манын, школым вӱдышӧ-влак видеоконференций, вашлиймаш, практический занятий да моло йӧнлан эҥерташ тӱҥалыт.
«Межэтнический журналистик школ» тӱҥ шотышто журналист профессийлан тунемше да самырык возышо, тыгак кумылан-влакым уша. Ийгот шот дене 28 ияш марте самырык ӱдыр-рвезе-влакым тушко ӱжалтыт. Гильдийын Марий Элысе пӧлкаже Марий кугыжаныш университетын студентше-влакым, тыгак кумылан-влакым ушаш шона. Вет эше эртыше ийын 23 августышто МарКУ ден Российысе межэтнический журналистик Гильдий коклаште кӱшнӧ палемдыме йодыш дене келшен пашам ыштыме шотышто ой-пидышым пеҥгыдемдыме. Тушто калык-влак коклаште келшен илыме да тиде кугу пашам самырык-влак коклаште виктарен шогымо йодышым эн тӱҥлан шотлымо.
Школышто яра туныктат. Занятий арняште ик гана эртаралтеш, чылаже кум тылзе тунемман. Курсышто тунемше-влакын возымо материалыштым республикысе СМИ-влак савыктат. Тунем лекше-влаклан сертификатым кучыктат. Виян тунемше-влакым Россий кӱкшытыштӧ тиде теме дене эртаралтше конференцийыш, форумыш колтат.
«Межэтнический журналистик школышто» ешартыш шинчымашым налаш кӧн кумылжо уло гын, (8632)45-88-51 телефон дене йыҥгыртен возалт кертыда але mari-centr@mail.ru электрон адресыш йодмашым колтыза.
