Погыным Удмурт Республикысе «Одо марий» регион кӱкшытан калыкле-тӱвыра автономийын Советшым вуйлатыше Анатолий Радыгин вӱден да тӱҥ докладым ыштен, марий-влакын илыман яллаште да олалаште ыштен шогымо паша дене палдарен, ыштышаш сомыл нергенат каласкален. Мутат уке, тыгодым чоным вургыжтарыше йодыш-влакым нӧлталын. Тудыжо тӱҥ шотышто ял ден ял коклаште пеҥгыде корно укелык нерген ойлен. МарНИИЯЛИ-н директоржо, историй шанче кандидат Евгений Кузьмин «Марий калыкын шӱдӧ ияш маякше. I Марий Погын нерген» теме дене докладым ыштен.

Варажым Погын шке пашажым кум секцийлаште шуэн. Икымше секцийыште Одо кундемысе марий мер ушемын вияҥме корныж нерген каласкалыме гын, кокымшо секцийыш ушнышо-влак этнокультур шинчымаш нерген ойленыт, марий йылмым туныктышо-влакын профессионал вияҥмаште лекше проблеме, улшо ресурс да ончыкылык корно нерген палемденыт. Тушто шке шонымашышт да паша кӱкшытышт дене Одо кундемысе институтласе преподаватель да школлаште туныктышо-влак палдареныт.

Мер ушемын самырыкъеҥже-влак, посна погынен, проект-влак гоч мер пашам вияҥдыме нерген кутыреныт.

Погын жапыште одо марий-влак марий сӱретче, Россий Федерацийын сулло художникше Иван Ямбердовын ончерже почылтын. Тыгак марий книга, марий вургем ончер-ужалымаш лийын.

Погын деч вара одо марий-влак Республикысе марий тӱвыра рӱдерын творческий группыжын да Марий Элын тӱвыран сулло пашаеҥже, мурызо Татьяна Денисован концертшым чон куанен онченыт.