«Падыраш» йоча фольклор ансамбльым Марий тӱвыра рӱдер пелен 2017 ий шыжым чумырымо. Тудым Э.В. Петрова, Марий Эл Республикын тӱвыран сулло пашаеҥже, вуйлата. Ансамбль «Чон оҥгыр» фольклор ансамбльын спутник-коллективше улеш.

«Падыраш» поян репертуар дене ойыртемалтеш, у сем композиций-влак тӱмыр, шиялтыш, пу совла, шун шӱшпык полшымо дене сӧрастаралтыт. Ансамбльын кум участникше гармоньым шоктат. Тидыже коллектив кӧргаштак гармоньчо ансамбльым ышташ йӧным ыштен.

Йоча ансамбль регион-влак кокласе, тӱнямбал конкурслаште сеҥен, дипломант семынат палемдалтын.